നൂറുവർഷങ്ങൾക്കു മുൻപ് ഇവിടെ  സർവ്വതന്ത്രസ്വതന്ത്രനായി  ജീവിച്ചു  സമാധിയടഞ്ഞ ചട്ടമ്പി സ്വാമികളുടെ മാഹാത്മ്യം മലയാളികൾ വേണ്ടത്ര തിരിച്ചറിഞ്ഞിരുന്നോ എന്നൊരു ചോദ്യത്തിനു ഇല്ല എന്നു  തന്നെയേ പറയാനാവൂ.കാരണം അത്രമേൽ ലാളിത്യമാർന്ന ജീവിതത്തിന്റെ മഹിമ മലയാളിയുടെ ഗർവിഷ്ഠമായ ധൈഷണികതക്കും മേലെയായിരുന്നു. ആ ധന്യമായ ജീവിതം ചുരത്തിയ വാത്സല്യധാര ആവോളം നുകർന്ന നാരായണഗുരു  ചട്ടമ്പി സ്വാമികളുടെ സമാധിക്ക് ശേഷം രചിച്ച ഈ ശ്ലോകദ്വയം മാത്രം മതി ആ മഹാത്മാവിന്റെ അപാര മഹിമ മനസ്സിലാക്കാൻ 

സർവജ്ഞ ഋഷിരുത്ക്രാന്തഃ

സദ്ഗുരുഃ ശുകവർത്മനാ

ആഭാതി പരമവ്യോമ്നി

പരിപൂർണ്ണകലാനിധിഃ.

ലീലയാ കാലമധികം

നീത്വാƒന്തേ സ മഹാപ്രഭുഃ

നിസ്സ്വം വപുഃ സമുത്സൃജ്യ

സ്വം ബ്രഹ്മവപുരാസ്ഥിതഃ.